Saturday, 24 February 2007

Таныг би…

Таныг би
Өргөөшөө, уртаашаа
Доошоо, дээшээ
Хагасалж нэг, дундалж нэг
Бүхлээр нэг, нэгжээр нэг
Бүлтийж нэг, жартайж нэг
Хэмжинэ.
Хэмжих тусам өргөжиж
Төөлөх бүр тэлнэ, Та…

Таныг би
Сэтгэл зүрхний лабораторит
Долоо томсгож
Нэг шилбүүрдэн
Шинжлэн судалж
Ширхэгчлэн үзэн
Баруунаас зүүн
Зүүнээс баруун
Хойноос урагш
Өмнөөс хойд руу,
Бүхлээс бутлан
Бутархайгаас бүхэлдэн
Тэмтрэн баримжаалж
Тааварлан харьцуулна.
Малтах тусам гүнзгийрч
Цоолох бүр зузаарна, Та…

Таних, танихгүйн зааг
Мэдэх, мэдэхгүйн хил дээр
Зугтахгүй, зузаарахгүй
Холдохгүй, ойртохгүй
Та бид хоёр жиргэнэ.
Тайзан дээр гоцлоно.

Тэмтрэхээр барьцгүй
Ширтэхээр ширвэж
Нүцгэлэхээр шоолон
Нурмайхаар ёжлон
Дүрэлзэхээр унтарч
Дүрвэхээр дэлбээлж
Надаар та үнэлүүлнэ.
Танаар би амьсгална.
Та надаар зугаацана.
Цаг хугацаа жороолоно…

2 comments:

Цахирмаа said...

Yamar goy bichee ve!!!

Anonymous said...

zygeer dajgui bolj tegexdee tiim ch taaj xemjij yadaad bx zuilgui l dee